"Os investigadores do grupo NanoMag da USC Yasser Attia, David Buceta,
M. Carmen Blanco e Arturo López Quintela comprobaron a “extraordinaria
actividade” fotocatalítica que posúen clústeres de prata para a
produción de hidróxeno a partir de auga, con rendementos entorno ao 10%.
O achado abre novas vías á produción de hidróxeno dun xeito respectuoso
co medio ambiente, a través da súa ‘fotoprodución’ a partir da auga
utilizando enerxía solar. Os investigadores consideran que fronte aos
combustibles sólidos, o hidróxeno é un combustible ideal, tanto polo seu
contido enerxético como polo seu nulo impacto medioambiental xa que o
único produto que se obtén da súa combustión é auga.
Non obstante, un dos maiores problemas que impide a utilización do
hidróxeno como combustible radica na súa produción, que implica o
consumo apreciable de enerxía tradicional. Os catalizadores actuais ou
ben non son viables economicamente ou presentan rendementos moi baixos
–próximos ao 0,1%– explican os investigadores da USC.
Os resultados obtidos por NanoMag serviron para “demostrar claramente
que os clústeres sub-nanométricos de metais en estado de oxidación cero,
contendo unicamente un número moi pequeno de átomos (menores a 50-100
átomos), compórtanse como semiconductores podendo absorber un fotón, coa
consecuente fotoxeración dun electrón e a creación dun oco”.
Na
presenza de especies que capten este oco (coñecidas como especies de
sacrificio ou especies oxidables -hole scavengers-) o fotoelectrón
xerado no clúster pode ser transferido de forma moi eficiente –dado o
extraordinario pequeno tamaño do clúster semiconductor- a un metal no
que este se atope depositado.
A través do metal (utilizado nos
experimentos reportados en forma de pequenas nanopartículas) os
fotoelectrones xerados son capaces de reducir a auga producindo
hidróxeno gas cunha grande eficiencia.
A produción fotocatalítica do hidróxeno acadouse utilizando clústeres
de prata que absorben predominantemente luz ultravioleta, co que se
aproveitaría so unha parte pequena da luz solar, sinalan os responsables
do equipo investigador.
Non obstante, os investigadores comprobaron
tamén que variando o tamaño dos clústeres é posible sintonizar a
lonxitude de onda de absorción, polo que “se poderían seleccionar
clústeres de diferentes tamaños, de forma que se puidera utilizar toda a
luz solar de forma moito máis eficiente”.
Este é un dos obxectivos prioritarios de investigación nos que se
encontra actualmente involucrado o grupo NANOMAG da USC en colaboración
con outros centros de investigación europeos, para poder superar os
problemas actuais e lograr producir hidróxeno de forma limpa e eficiente
mediante celdas solares.
O traballo deste equipo do Instituto de
Investigacións Tecnolóxicas da USC, en colaboración cos profesores
Giampaolo Barone da Universidade de Palermo e Mona Mohamed da
Universidade do Cairo, acaba de publicalo a prestixiosa revista Journal
of the American Chemical Society." (Galicia Confidencial, 01/03/2014)
No hay comentarios:
Publicar un comentario